Ministrja në detyrë e Punëve të Jashtme, Donika Gërvalla, e ka sulmuar kryeprokurorin e Prokurorisë Speciale, Blerim Isufaj, pasi ministri në detyrë i Bujqësisë, Faton Peci, u mor në pyetje nga Prokuroria Speciale për skandalin e fabrikës së mbetjeve shtazore.
Gërvalla marrjen në pyetje të Pecit e quajti inskenim të gërditshëm të Isufajt ndaj Pecit,ku këtë të fundit e quajti “ministri më shembullor i këtij mandati”.
“Hakmarrje e shëmtuar ndaj betejës së suksesshme të Fatonit kundër korrupsionit dhe guximit të tij për t’u ballafaquar me secilën shkelje të ligjit, pa marrë parasysh se sa të rrezikshëm janë shkelësit dhe sa shumë shokë e ortakë kanë në Prokurorinë Speciale”.
“Kur pikërisht ata që e kanë për detyrë ta mbrojnë shtetin ligjor dhe qytetarët e Republikës nga krimi i keqpërdorin organet e drejtësisë për hakmarrje dhe për të njollosur figurat e suksesshme dhe të pastra politike, atëherë asgjë më nuk duhet të na habisë”, shkroi Gërvalla, transmeton Klankosova.tv.
Në lidhje me intervistimin e Pecit ka reaguar edhe Partia Guxo, e cila tha se shpreh shqetësimin me veprimet e fundit të Prokurorisë Speciale, e cila sipas tyre, po jep shenja se është bërë pjesë e lojërave politike.
“E gjithë kjo çështje merr një shije edhe më të hidhur kur kihet parasysh që krejt “rastësisht” prokurori i rastit të sajuar është ish-sekretar i Forumit Rinor të PDK-së në Prizren”.
“Ministri Peci është simbol i përkushtimit të palëkundur në luftën kundër krimit dhe korrupsionit. Me vendosmëri dhe integritet të lartë, ai ka qenë në vijën e parë të përpjekjeve për pastrimin e institucioneve dhe për rikthimin e besimit qytetar në shtetin e së drejtës”, thuhet në reagim, transmeton Klankosova.tv.
Tutje, Guxo tha se qëndrojnë fuqishëm krah Pecit dhe dënon çdo përpjekje për njollosjen e figurave të ndershme që punojnë për interesin publik.
