Ministria e Brendshme e Ekuadorit ka njoftuar arrestimin e Dritan Gjikës.
47-vjeçar sipas mediave atje, ishte i shumëkërkuar ndërkombëtarisht për trafik droge, pastrim parash dhe krim të organizuar.
Sipas autoriteteve ekuadoriane, ai u arrestua sot më 26 maj në Abu Dhabi, Emiratet e Bashkuara Arabe, gjatë një operacioni të përbashkët të Interpolit të Ekuadorit dhe homologëve të tyre me mbështetjen e platformës ndërkombëtare PAcCTO 2.0.
“Dritan Gjika, udhëheqësi i mafies shqiptare në Ekuador, u arrestua në Emiratet e Bashkuara Arabe… për qëllim ekstradimi”, thuhet në njoftimin zyrtar transmeton Klankosova.tv.
Gjika, i cili ka dy njoftime të kuqe nga Interpoli, kishte hyrë për herë të parë në Ekuador në vitin 2009 me vizë të përkohshme.
Sipas Prokurorisë së Ekuadorit, ai udhëhiqte një rrjet të fuqishëm kriminal që operonte në Ekuador dhe Spanjë, duke transportuar sasi të mëdha droge drejt vendeve të Evropës dhe Amerikës Qendrore.
Organizata e drejtuar prej tij kishte strukturë të mirë organizuar, përfshirë logjistikë, kompani legjitime për pastrim parash, si dhe bashkëpunëtorë në porte që ndihmonin në manipulimin e kontejnerëve me drogë përmes metodës së njohur si “grepi i verbër”.
Në shkurt të vitit 2024, pas një bastisjeje në Guayaquil, autoritetet e kishin identifikuar 47 vjeçarin shqiptar, si drejtuesin e këtij rrjeti.
Aktualisht, pritet nisja e procedurave për ekstradimin e tij në një nga vendet ku është i kërkuar.
