Në festimet e Ditës së Fitores në Rusi, presidenti rus Vladimir Putin ka falënderuar presidentin kinez Xi Jinping që i është bashkuar festës, duke thënë se të dy vendet tani qëndrojnë bashkë kundër “neonazizmit”.
Reuters shkruan se prania e Xi në festimet e përvjetorit të përfundimit të luftës, ofron një shtysë të rëndësishme për liderin e Kremlinit, i cili e ka portretizuar luftën e tij në Ukrainë si një luftë kundër “nazistëve modern”.
“Fitorja ndaj fashizmit, e arritur me koston e sakrificave të mëdha, është me rëndësi të madhe. Së bashku me miqtë tanë kinezë, ne qëndrojmë fort mbrojtës të së vërtetës historike, mbrojmë kujtimin e ngjarjeve të viteve të luftës dhe kundërveprojmë ndaj manifestimeve moderne të neonazizmit dhe militarizmit,” është shprehur Putin.
Në anën tjetër Xi ka thënë se të dy vendet, si fuqi botërore dhe anëtarë të përhershëm të Këshillit të Sigurimit të OKB-së, do të punojnë së bashku për të luftuar “unilateralizmin dhe ngacmimin” – një referencë e nënkuptuar për Shtetet e Bashkuara.
Ai tutje ka shtuar se do të “promovojnë së bashku pikëpamjen e saktë të historisë së Luftës së Dytë Botërore, do të mbrojnë autoritetin dhe statusin e Kombeve të Bashkuara, do të mbrojnë me vendosmëri të drejtat dhe interesat e Kinës, Rusisë dhe shumicës dërrmuese të vendeve në zhvillim, dhe do të punojnë së bashku për të promovuar një globalizim ekonomik të barabartë, të rregullt, multipolar dhe gjithëpërfshirës”.
Nga dhjetëra liderë të huaj që janë duke marrë pjesë në festimet që po mbahen në Moskë, Xi është ndër më të fuqishmit, ndërsa vizita e fundit, shënon herën e 11-të të tij në Moskë – më shumë se në çdo vend tjetër.
Kujtojmë se këto festime janë duke u zhvilluar në një moment kyç të luftës me Ukrainën, ndërsa të dyja vendet janë nën presion të ShBA-së, për të arritur një marrëveshje për paqe.
