Pas gjashtë tentimeve të dështuara për ta zgjedhur Albulena Haxhiun si kryetare të Kuvendit, kryeministri në detyrë dhe lideri i Lëvizjes Vetëvendosje, Albin Kurti, është dorëzuar – duke ftuar për konsultime liderët e opozitës, Memli Krasniqin (PDK) dhe Lumir Abdixhikun (LDK).
Takimi është thirrur për mëngjesin e 1 majit, në orën 08:30, në sallën N-204 të Kuvendit të Kosovës, ku Kurti shpreson të arrihet një marrëveshje për konstituimin e Kuvendit dhe zgjedhjen e kryetarit të tij.
Ftesa e Kurtit vjen si reflektim i presionit në rritje politik dhe institucional pas tetë seancash pa rezultat, ku shumica nuk arriti të sigurojë votat për të kaluar propozimin për kryetare të Kuvendit.
Në letrën e tij, Kurti e ka justifikuar ftesën me Kushtetutën dhe përfaqësimin proporcional:
“Duke u bazuar në Kushtetutë, tre nënkryetarë do të jenë nga tri partitë që fituan më së shumti ulëse, andaj ju ftoj për një takim të përbashkët edhe me z. Memli Krasniqi, kryetarin e PDK-së…”.
Pritet të shihet nëse dy liderët opozitarë do ta pranojnë këtë ftesë. Kujtojmë që Lumir Abdixhiku e kishte refuzuar një ftesë të ngjashme më 8 prill, duke thënë se “një takim i tillë do të ishte kapërcim fatal i dinjitetit njerëzor dhe politik”.
Ndërkohë, PDK-ja as nuk ishte ftuar në përpjekjen e parë, duke rritur më tej tensionet politike. Madje, Glauk Konjufca kishte deklaruar publikisht se “fakti që VV e ka ftuar vetëm LDK-në tregon kë preferon më shumë”.
Me këtë zhvillim të ri, Kurti pranon për herë të parë se pa opozitën nuk mund të zhbllokojë situatën politike në vend – një sinjal i qartë se rruga drejt konstituimit të institucioneve kërkon kompromis, bashkëpunim dhe ndoshta edhe kthesë të fortë politike.
A do ta shfrytëzojnë këtë hap PDK dhe LDK për ta rishkruar rrjedhën e zhvillimeve? Apo do të mbesin në qëndrimet e tyre të forta kundër bashkëpunimit me Kurtin?
