Presidenti amerikan Donald Trump sinjalizoi dje mundësinë e një lehtësimi të luftës tregtare me Kinën, duke thënë se tarifat e larta për mallrat kineze “do të ulen ndjeshëm, por nuk do të jenë zero”.
Në një konferencë shtypi në Shtëpinë e Bardhë, Trump zbuti tonin e tij të mëhershëm të ashpër pas javësh masash hakmarrëse që kanë sjellë tarifa për mallrat kineze deri në 145%.
“145% është shumë e lartë dhe nuk do të qëndrojë në atë nivel”, tha Trump, duke iu përgjigjur pyetjeve të gazetarëve në Zyrën Ovale. “Nuk do të jetë askund afër kësaj. Do të bjerë ndjeshëm. Por nuk do të jetë zero.”
Deklaratat e Trump pasuan komentet e Sekretarit të Thesarit, Scott Bessent, i cili tha më herët gjatë ditës se tarifat aktuale midis SHBA dhe Kinës praktikisht kanë bllokuar tregtinë midis dy vendeve.
Bessent tha në një konferencë për investime private të organizuar nga JP Morgan Chase se ai beson se konflikti tregtar me Kinën është i paqëndrueshëm dhe se ai pret që konflikti të de-përshkallëzohet së shpejti, konfirmoi për CNN një burim i njohur me deklaratat e tij.
Në vend të një ndarje të plotë, Bessent u tha investitorëve se qëllimi ishte balancimi i marrëdhënieve tregtare – një vlerësim që nxiti më tej optimizmin në tregjet e aksioneve. Pasi deklaratat e tij u bënë publike, të tre indekset kryesore të aksioneve amerikane arritën nivelet më të larta ditore.
Deri më tani, Kina ka mbajtur një qëndrim të ashpër dhe ka vazhduar me kundërmasat: rriti tarifat për mallrat amerikane në 125%, shtoi gjithnjë e më shumë kompani amerikane në listën e subjekteve jo të besueshme dhe kufizoi eksportin e mineraleve kritike të përdorura në prodhimin e iPhone dhe sistemeve ushtarake.
Përveç kësaj, Kina ka kufizuar shfaqjen e filmave të Hollivudit në kinematë e saj dhe ka kthyer të paktën dy Boeing që ishin të destinuara për linjat ajrore kineze.
Pavarësisht tensioneve tregtare, Trump ka pohuar vazhdimisht se ai ka një “marrëdhënie shumë të mirë” me presidentin kinez Xi Jinping dhe se ai është në pritje të përgjigjes së tij. Sipas një raporti të CNN, ekipi i Trump nuk do të bëjë lëvizjen e parë.
