Ushtria izraelite ka urdhëruar që popullata e Gazës të evakuohet nga pjesa lindore dhe të drejtohet drejt pjesës qendrore të territorit palestinez, pasi Izraeli kreu një valë sulmesh ajrore në enklavë herët në mëngjes. Urdhrat e lëshuara sot tregojnë se Izraeli mund të rifillojë operacionet tokësore në Gaza, raporton AP.
M sulmet që po vazhdojnë, shumë njerëz po ikin në zona që i konsiderojnë më të sigurta. Izraeli i ka këshilluar banorët e Gazës që të shkojnë në Khan Younis në jug, ose në zonat perëndimore të qytetit të Gazës.
Koordinatori humanitar i Kombeve të Bashkuara për territoret e pushtuara palestineze ka bërë thirrje për një armëpushim të menjëhershëm në Gaza pasi sulmet ajrore izraelite goditën enklavën. “Valët e sulmeve ajrore kanë goditur Rripin e Gazës që nga orët e hershme të mëngjesit të sotëm… Kjo është e pandërgjegjshme. Armëpushimi duhet të rivendoset urgjentisht,” tha Muhanad Hadi i OKB-së në një deklaratë, raportoi Reuters.
Ndërkohë, Këshilli i Sigurimit i Kombeve të Bashkuara ka caktuar një takim për sot për të diskutuar situatën në Gaza dhe “çështjen palestineze”. Takimi ishte planifikuar edhe përpara se Izraeli të sulmonte Gazën natën mes të hënës dhe të martës.
Grupi palestinez Hamas lëshoi një deklaratë duke thënë se pretendimet izraelite se Hamasi po riarmatosej dhe po përgatitej për të kryer sulme ishin “të pabaza” dhe “thjesht justifikime të dobëta për të justifikuar rikthimin në luftë”.
Izraeli “po përpiqet të mashtrojë opinionin publik dhe të krijojë justifikime të rreme për të mbuluar vendimin e tij të mëparshëm për të vazhduar gjenocidin kundër civilëve të paarmatosur”, tha Hamasi, duke shtuar se qeveria e Netanyahut ishte “indiferente” ndaj kushteve të armëpushimit.
Kryeministri izraelit pritej të dëshmonte në gjyqin për korrupsion kundër tij, por paraqitja e tij u shty për shkak të “zhvillimeve të sigurisë” në Gaza.
