E marta e 5 nëntorit, në rrugën “Bal Alia” të Pejës, rreth pesëdhjetë metra nga shkolla fillore “Xhemaj Kada”, solli një situatë të rëndë.
Pesë nxënës u përballën me një situatë tejet shqetësuese. Ata, me përfunduar kursin plotësues rrugës për në shkollë kanë hasur në një veturë me dy persona të panjohur, të cilët kanë tentuar t’i hipnin në veturë kinse për t’i afruar në shkollë.
Tre vajza dhe dy djem, të shqetësuar, menjëherë kanë vrapuar drejt shkollës.
Njëra prej nxënësve për shkaqe të sigurisë e rrëfen këtë moment në kushte anonimiteti.
“Ne nuk biseduam me ta dhe vazhduam që të ecnim për tek shokët dhe shoqet, pastaj makina shkoi te shokët dhe iu bënte pyetje “Ejani me mua, unë do t’ju çoj në shkollë”.
Dhe ata u larguan, ju thanë “jo”. Ata dy personat u afruan afër neve përsëri, na thanë “hajdeni se na kena me ju dërgua në shkollë”. Na u larguam përsëri dhe kur e pamë që diçka nuk o mirë, dhe ke vendi shumë i mbyllur, na vazhduam që të vraponim që të vinim sa më shpejt në shkollë”, ka deklaruar nxënësja.
Kjo nxënëse tregon se vetura e panjohur ka vazhduar t’i ndiqte deri te kthesa e shkollës.
“Ne vazhduam rrugën tonë, kur e pamë që veç po na afrohen, po mundohen me bo diçka, na vazhduam me vrapu dhe kur na panë që kemi vazhdu me vrapu, ata shkuan edhe na dolën tek rruga tjetër, por aty kishte publik, nuk mujten kurrgjë me bë, vetëm na këqyren prej pasqyrës dhe na bonën me kokë”, tregon tutje nxënësja.
Drejtori i kësaj shkolle tha se nxënësit e shqetësuar fillimisht janë trajtuar nga psikologja e shkollës.
Ai tregon se menjëherë janë njoftuar prindërit dhe rasti është lajmëruar në polici.
“Fëmijët kanë ikë prej atij momenti, por me çfarë qëllimi ka qenë ajo, as ne nuk e dimë. Kanë ardhë në shkollë të shqetësuar dhe menjëherë janë lajmërua tek zëvendësdrejtoresha bashkë me mësuesen. Me mësuesen drejtë kanë shku te psikologja, se i kanë vërejtë fëmia, se kanë qenë pak të shqetësuar në atë moment prej frike, është normale. Pas konsultimit te psikologu zëvendësdrejtoresha dhe mësuesja, i kanë ftu prindet dhe kështu që prindërit menjëherë kanë shku dhe e kanë raportu rastin në polici”, ka deklaruar drejtori.
Zyrtarët policorë e kanë konfirmuar këtë rast, duke theksuar se vetura kishte targa të Shqipërisë.
“Nxënësit kanë refuzuar, i kanë njoftuar prindërit. Prindërit e kanë njoftu Policinë për rastin, pasi që është vlerësuar si shqetësim, njësitet kompetente menjëherë kanë filluar të ndërmarrin veprimet hetimore kuptohet në koordinim me Prokurorin e Shtetit, është duke u punuar rreth rastit, nuk ka vend për shqetësim”, ka deklaruar për RTK-në zëdhënësi i Policisë së Kosovës për Rajonin e Pejës, Fadil Gashi.
Me këtë rast tashmë po merret prokuroria e cila thekson se ka kërkuar nga policia që të shtohen patrullimet afër objekteve shkollore.
“Aktualisht, përderisa nuk i kemi personat në procedurë penale, përderisa të njëjtit nuk i kemi të arrestuar, nuk mund të flasim për cilësimin e veprës penale, mirëpo çfarë relevante është se duke u punuar në mënyrë intensive në koordinim të plotë me Policinë e Kosovës që të identifikohet fillimisht vetura, më pas personat në veturë dhe të njëjtit të arrestohen dhe të kuptohet qëllimi i tyre pse kanë shkuar aty. Deri më tani kemi pranuar informata që qëllimi i tyre s’ka qenë i mirë”, ka deklaruar Shkodran Nikqi nga Prokuroria e Pejës. /RTK
