Presidenti i Ukrainës, Volodymyr Zelensky, deklaroi sot se Rusia ka “frikë” nga raketat amerikane Tomahawk me rreze të gjatë veprimi, duke i quajtur ato një “armë e fortë”.
Komentet e tij u bënë në një prononcim për gazetarët pas takimeve në Shtetet e Bashkuara.
Lidhur me përpjekjet e Ukrainës për të siguruar raketat Tomahawk nga SHBA-të, Zelensky sugjeroi se deri më tani nuk ka pasur ndonjë lëvizje konkrete për këtë çështje, por theksoi: “Ne kemi nevojë për to”, raporton CNN.
I pyetur nga një gazetar jashtë Shtëpisë së Bardhë nëse ishte optimist për një marrëveshje me SHBA-të për furnizimin me armë, presidenti ukrainas u shpreh se ishte “realist”.
Zelensky shtoi se gjatë vizitës në SHBA ka diskutuar edhe mbi dronët me ekipin e Donald Trump, duke sugjeruar një marrëveshje të mundshme shkëmbimi: Kievi mund t’i ofrojë SHBA-ve dronë të prodhuar në Ukrainë në këmbim të raketave lundruese Tomahawk.
Më herët, Zelensky tha se ka folur me Presidentin Donald Trump për armët me rreze të gjatë veprimi, por refuzoi të japë më shumë detaje, duke theksuar se SHBA-të “nuk duan përshkallëzim”.
