Për vite kanë qenë kundërshtarët më të ashpër politik të njëra tjetrës. Mirëpo, tashmë LVV dhe PDK e kanë zbutur diskursin kur pyeten për vija të kuqe. Partia e Albin Kurtit e ajo e Kadri Veselit, pas më shumë se 1 dekade armiqësi politike, nuk po e përjashtojnë mundësinë e bashkëpunimit.
Me Lidhjen Demokratike të Kosovës, Vetëvendosjes qeverisja i zgjati vetëm 50 ditë.
Ani pse LDK’ja u pa si partneri i vetëm i denjë për koalicion me ta, qëndrimin partia e Albin Kurtit e ka ndryshuar pas mocionit që u votua në Kuvend.
Tashmë, vijat e kuqe që i patën për partitë e ish’bllokut PAN, i kanë zëvendësuar me deklarim se mund të bashkëpunohet me krejt partitë, vetëm që duhet të dakordohen paraprakisht për ministrat, që të mos kenë probleme si në rastin e Agim Veliut.
Kështu ka deklaruar njeriu i dytë më i votuar në Vetëvendosje pas Albin Kurtit, ministri në detyrë i Punëve të Jashtme, Glauk Konjufca kur u pyet për bashkëpunimin me Partinë Demokratike.
Duke mos e përjashtuar mundësinë e një koalicioni, Konjufca ka deklaruar se dakordimi kryesor duhet të bëhet për cështjen e ministrave.
“Mendoj që Vetëvendosje duhet ta marrë atë subjekt politik në qeverisje e cila i dërgon ministrat më të pa korruptuar në Qeveri, për shembull i ke tre ministra i dërgon emrat, i shikon VV, nëse kanë afera, nuk pranohen.
Gjatë këtij muaji në LVV do të shtohen zërat që thonë që LVV duhet të dalë me konceptin që me dalë e para në zgjedhje, dhe pastaj si e formon qeverinë është të përqendrohet tek ministrat e ndershëm, tek negocimi i ministrave. Lëvizja Vetëvendosje duhet t’i negociojë ministrat kur të vijë momenti aty, unë po e shfaqi mendimin personal, mendoj që duhet të ketë një përparësi të lehtë LDK-ja, por jo në mënyrë dogmatike si në të kaluarën”, ka deklaruar ai.
Konjufca gjithashtu ka thënë se LDK’ja është duke u treguar më agresive se PDK’ja teksa ka shtuar se një gjë e tillë është zhgënjyese.
“Unë kam thënë vetëm gjatë muajit mars, shikojeni qëndrimin e tyre gjatë mocionit, shikoni konferencat e tyre për shtyp ju e shihni një agresivitet më të madh të LDK-së sesa i PDK-së, kjo është zhgënjyese”, ka thënë Konjufca në Rubikon.
Deklaratës së Konjufcës iu është përgjigjur me diskurs të njejtë edhe kreu i PDK’së, Kadri Veseli. Edhe lideri i Partisë Demokratike nuk e ka përjashtuar mundësinë e bashkëpunimit. Ai thotë se nuk ka vija të kuqe me asnjë parti.
“Nuk kam vija të kuqe, po e ritheksoj, me asnjë parti, nuk është sot që po e them. Ato vija të kuqe e kanë dëmtuar Kosovën. Është mirë të largohen nga mohimi qytetar, për hir të disa mohimeve për të fituar në elektorat. Nuk e shoh bashkëpunimin me secilën parti, ne qëndrojmë në opozitë, po reflektojmë në atë se kemi bërë mirë në këtë vend dhe jemi krenarë”, ka shtuar ai.
“Asnjë partie në Kosove që zgjidhet nga qytetarët nuk i bëj vija të kuqe, nuk i bëj kryq, s’ka diferencim, s’ka vija të kuqe për shqiptarët, edhe gjatë fushatës. Mos, se jeni duke dëmtuar. Nuk shoh bashkëpunim me secilën parti, janë disa kritere, në rend të parë lufta kundër korrupsionit, dhe mbrojtja e integritetit territorial. S’kam kryq, me asnjë. Është çështje e marrëveshjes mbi baza parimore, që nuk e lënë Kosovën pas 50 ditëve të dështojë”, është shprehur Veseli.
Lëvizja Vetëvendosje duhet që të dërgojë propozimin për mandatarin te presidenti i vendit, në mënyrë që kjo parti të tentojë edhe njëherë në kuvend të Kosovës krijimin e qeverisë.
Derisa LVV’ja nuk ka deklaruar se ka ndonjë partner me të cilin synon të bëjë qeverinë, LDK’ja po pret që të bashkëpunojë me AAK’në, Nismën dhe minoritetet.
