Autoritetet e Kosovës kanë akuzuar të hënën Serbinë për cenim të integritetit territorial, pasi Policia e Kosovës bëri të ditur se më 1 nëntor një shtetas i Kosovës, i nacionalitetit serb, me inicialet M.V., dyshohet se është plagosur dhe rrëmbyer nga xhandarmëria serbe në zonën e Leposaviqit.
Të martën, kryeministri në detyrë i Kosovës, Albin Kurti, deklaroi se qytetari i rrëmbyer, i cili përveç sulmit ishte edhe i plagosur, u rrëmbye nga Serbia vetëm për shkak të kundërshtimit të politikave dhe regjimit të presidentit serb Aleksandar Vuçiq.
“Sulmi, me çfarë dimë deri tani, ka ndodhur në territorin e Republikës së Kosovës. Qytetari i sulmuar e i plagosur, i rrezikuar për jetë, është shtetas i Republikës së Kosovës. Gjithçka tregon se e kanë sulmuar sepse është kundërshtar i politikave dhe i regjimit të presidentit të Serbisë, Aleksandar Vuçiç”, tha Kurti në një konferencë për media.
Ai shtoi se Policia gjendet në vendin e ngjarjes që prej momentit të raportimit, në bashkëpunim me KFOR-in dhe EULEX-in, dhe po kryen procedurat hetimore.
“Është e qartë se fqinjët tanë verior po vazhdojnë me sulmet e tyre, të cilat kanë për qëllim disiplinimin e serbëve dhe, në të njëjtën kohë, destabilizimin e Kosovës”, shtoi Kurti.
Presidentja e Kosovës, Vjosa Osmani, u shpreh të martën se, sipas informacioneve nga dëshmitarët dhe familjarët, qytetari i rrëmbyer është plagosur me qëllim që të vritet dhe më pas është tërhequr duke u kidnapuar.
“Dyshimi është se këtu ka pasur jo vetëm shkelje të sovranitetit, por edhe sulm ndaj një qytetari të Kosovës me qëllim që ai të vritet”, tha Osmani.
Sipas presidentes, institucionet relevante në bashkëpunim me aleatët po hetojnë saktësisht vendndodhjen e rastit dhe do të publikojnë një raport të detajuar.
“Nuk është vetëm provokim, por një sulm që rrezikon paqen dhe stabilitetin jo vetëm në zonën tonë kufitare, por edhe në gjithë rajonin”, shtoi Osmani.
Autoritetet serbe nuk janë deklaruar për këtë rast.
Policia e Kosovës ka bërë të ditur se vendi i ngjarjes dyshohet të jetë brenda territorit të Republikës së Kosovës, në zonën e njohur si “pika zero”, pranë Leposaviqit, qytet i banuar me shumicë serbe. Ky institucion po bashkëpunon ngushtë me KFOR-in, përgjegjës për sigurinë në këtë brezin kufitar.
