Në kuadër të përgatitjeve për sezonin e ardhshëm të ngrohjes, kompania publike Termokos ka nisur intervenimet e domosdoshme në rrjetin primar të ngrohjes në rrugën “Rexhep Luci”, në zemër të Prishtinës.
Kryeshefi i Termokosit, Fisnik Osmani, tha se ky projekt është pjesë e planit aksional të kompanisë dhe do të mundësojë një zgjidhje të përhershme dhe të qëndrueshme për furnizimin me energji termike në këtë pjesë të qytetit.
“Në kuadër të planit aksional për sezonin e ardhshëm të ngrohjes, filluam intervenimet e domosdoshme në rrjetin primar! Ky intervenim do të mundësojë zgjidhje të përhershme dhe të qëndrueshme për energji termike në këtë pjesë të qendrës së Prishtinës”, deklaroi Osmani.
Ai shprehu mirënjohje për ekipet teknike të Termokosit, të cilët po punojnë me përkushtim dhe profesionalizëm për zbatimin e këtij projekti jetik për kryeqytetin.
“Falënderim i thellë për kolegët tanë në ngrohtore, të cilët me përkushtim e profesionalizëm po implementojnë planin aksional të intervenimeve në rrjet”, shtoi ai.
Me këto veprime, Termokos synon të kontribuojë më tej në zhvillimin e Prishtinës së Gjelbër, duke ofruar energji më efikase dhe më të qëndrueshme për banorët e saj.
