Kryetari i komunës së Vitisë, Sokol Haliti, ka reaguar pas vendimit të Shteteve të Bashkuara të Amerikës për të ndërprerë dialogun strategjik me Kosovën, duke e quajtur këtë një “alarm të fuqishëm politik e diplomatik” për vendin.
Haliti ka theksuar se Kosova nuk ka asnjë rrugë tjetër përveçse të qëndrojë krah për krah me SHBA-në, me një aleancë të palëkundur dhe vizion të përbashkët për të ardhmen.
“Kosova është projekt i përbashkët i sakrificës së popullit tonë dhe mbështetjes amerikane. Kjo marrëdhënie nuk është thjesht diplomatike – është themeli i lirisë dhe shtetësisë sonë. Çdo hap që e dëmton këtë besim e aleancë është goditje për interesat kombëtare dhe sigurinë e qytetarëve tanë,” ka thënë ai.
Sipas Halitit, në vend të thellimit të bashkëpunimit, vendi po përballet me një ftohje të rrezikshme të raporteve me Amerikën, për çka ai fajëson lidershipin aktual politik.
“Përgjegjësia bie mbi lidershipin aktual politik, i cili me vendime të pamatura, retorikë përjashtuese dhe injorim të partnerëve ndërkombëtarë, ka futur Kosovën në izolim të panevojshëm,” ka deklaruar kryetari i Vitisë.
Ai u ka bërë thirrje të gjitha forcave politike që të tregojnë mençuri dhe përgjegjësi për të rikthyer dialogun dhe për të forcuar aleancën me SHBA-në.
“Besnikëri ndaj SHBA-së është siguri për Kosovën, sepse e ardhmja e plotë e vendit tonë është në krahët e Amerikës,” ka përfunduar Haliti.
