Zyrtari i Ministrisë së Kulturës, Rinisë dhe Sportit, Labinot Berisha, e ka rrezikuar komunikacionin në orët e hershme të mëngjesit të sotëm, duke kaluar sipas dëshmitarëve në të kuqen në semafor dhe duke vozitur në gjendje të dehur. I njëjti, këto veprime i ka bërë derisa po voziste veturën zyrtare të kësaj ministrie, Renault, me targa 3Z-145-17.
Demokracia.com ka mësuar ekskluzivisht se ngjarja ka ndodhur pas mesnatës, rreth orës 02:15 të mëngjesit në Fushë Kosovë, afër Kazermës “Adem Jashari”. Siç ka mësuar Demokracia.com, zyrtari i MKRS-së, Labinot Berisha kishte bërë vozitje të rrezikshme dhe pas ndalimit nga patrulla e policisë, që ishte njoftuar nga dëshmitarët për hyrje në semafor në të kuqen, të njëjtit i ishte bërë matja me alkootest, ku kishte rezultuar i dehur me 1.12 promil alkool në gjak.
Pas ndalimit nga policia, ky zyrtar kishte konfirmuar se punon në Ministrinë e Kulturës, Rinisë dhe Sportit dhe kishte autorizim 24 orë për të drejtuar mjetin zyrtar, me të cilin kishte bërë vozitje të rrezikshme. Megjithatë, Berisha nuk e kishte me vete kartelën zyrtare dhe as fletudhëtimin për veturën zyrtare, për të cilat mësohet se i kishte thënë policisë që i kishte harruar në vendin e punës.
I kontaktuar nga Demokracia.com, Labinot Berisha ka mohuar se ka hyrë në të kuqen në semafor, por ka konfirmuar që ka rezultuar me sasi më të madhe të alkoolit sesa që lejohet.
“Nuk është e vërtetë që kam hyrë në semafor në të kuqen, por kam rezultuar me sasi më të madhe të alkoolit, gjë që më vjen keq për këtë”, ka thënë Berisha për Demokracia.com.
Lidhur me këtë kundërvajtje, Demokracia.com ka mësuar se këtij zyrtari i është shqiptuar fletëparaqitje për kundërvajtje në shumën prej 300 euro, masa mbrojtëse 9 muaj dhe 2 pikë negative, si dhe vetura është larguar nga komunikacioni në parkingun më të afërt.
Demokracia.com ka pyetur edhe në Policinë e Kosovës lidhur me këtë rast, por të njëjtit ende nuk kanë kthyer përgjigje.
Po ashtu, pyetje lidhur me këtë rast i janë dërguar edhe MKRS-së. /Demokracia.com/
