Prokuroria Speciale e Kosovës, ka njoftuar se tashmë ka caktuar prokurorin për rastin e kërcënimit me jetë që i është bërë presidentes të vendit, Vjosa Osmani.
Kjo është bërë e ditur nga Arbnora Luta, zëdhënëse e Prokurorisë Speciale.
Siç ka thënë Luta, prokurori është caktuar të enjten, pra më 22 maj, pas pranimit të raportit policor në lidhje me veprimet fillestare
Luta tha se pas pranimit të informacionit nga Policia e Kosovës, në lidhje me rastin në fjalë, Prokurori kujdestar nga Prokuroria Speciale, ka autorizuar njësitë kompetente të Policisë së Kosovës për të vepruar menjëherë në drejtim të identifikimit dhe zbulimit të autorit/ve të dyshuar per kryerjen e kesaj vepre penale.
“Ndërsa, të enjten pas pranimit të raportit policor në lidhje me veprimet fillestare, menjëherë është caktuar prokurori përgjegjës nga Prokuroria Speciale dhe rastin do ta trajtoj me prioritet të lartë duke ndërmarrë të gjitha veprimet e nevojshme hetimore për të siguruar zbardhjen e plotë të çështjes dhe ndëshkimin e përgjegjësve të këtyre akteve”- tha Luta për Kallxo.com.
Sipas Lutës, Prokuroria Speciale e së Kosovës ka ndërmarrë të gjitha veprimet e nevojshme hetimore lidhur me rastin e kanosjes se Presidentes së Republikës së Kosovës.
“Po ashtu, Prokuroria Speciale, siguron opinionin publik se është në koordinim të plotë me organet e sigurisë, për të garantuar mbrojtjen e rendit kushtetues dhe të përfaqësuesve të lartë të shtetit”- tha Luta për Kallxo.com.
Duhet theksuar se, lidhur me rastin e Osmanit, nga presidenca ka pasur reagime gjatë ditës së sotme, nga të cilët është theksuar se ende s’ka pasur asnjë të arrestuar edhe pse ka pasur dhjetëra kërcënime.
Po ashtu, nga presidenca gjatë ditës ishte thënë se janë njoftuar nga Prokuroria Speciale se nuk e kanë ngarkuar ende asnjë prokuror që të merret me rastin.
Ka qenë këshilltari i Osmanit, Bekim Kupina, ai që në një përgjigje për Gazetën Express, tha se deri tash ka pasë kërcënime në vazhdimësi dhe të tilla që janë bërë pa e fshehur identitetin.
“Rreth një javë pas raportimit të kërcënimit të fundit me jetë të Presidentes Osmani i ardhur në adresën elektronike zyrtare të Presidencës dhe hapjes së rastit nga Policia, sot jemi njoftuar nga Policia se Prokuroria Speciale se nuk e ka ngarkuar ende asnjë prokuror të merret me kërcënimet ndaj Presidentes Osmani. Deri tash ka pas dhjetëra kërcënime në vazhdimësi, por asnjë i arrestuar nga organet përgjegjëse, edhe pse shumë prej tyre kërcënimet i kanë bërë pa e fshehur identitetin”, kishte deklaruar ai më herët gjatë ditës së sotme.
