Një 19-vjeçar është ndaluar nga Policia e Kosovës në orët e para të mëngjesit në Pejë, pasi gjatë një kontrolli rutinë, në veturën që ai drejtonte u gjet armë zjarri me municion.
Burime të Gazetës Sinjali bëjnë me dije se rasti ka ndodhur më 1 korrik 2025, rreth orës 00:30, në rrugën “Besnik Lajqi”, ku një patrullë policore ka ndaluar veturën BMW X6, të cilën e drejtonte Gj.K., 19-vjeçar.
Gjatë kontrollit të veturës, nën ulësen e shoferit është gjetur një armë e mbushur me karikator dhe municion, për të cilën i riu nuk posedonte leje.
Policia ka sekuestruar armën dhe municionin si prova materiale, ndërsa i dyshuari është intervistuar në cilësinë e të dyshuarit. Me vendim të Prokurorit të Shtetit, ndaj tij është iniciuar procedurë për veprën penale “Mbajtje në pronësi, kontroll ose posedim të paautorizuar të armëve”.
Pas intervistimit, i riu është liruar në procedurë të rregullt, ndërsa rasti është duke u trajtuar nga njësitë hetimore përkatëse.
