Nëse Presidenti i SHBA-së, Donald Trump dëshiron vërtet të fitojë çmimin Nobel për Paqen, ai duhet të ndalojë luftën në Gaza, tha të martën Presidenti Francez Emmanuel Macron.
Duke folur për televizionin BFM TV të Francës nga Nju Jorku, Macron tha se vetëm Trump kishte fuqinë të ushtronte presion mbi Izraelin për t’i dhënë fund luftës.
“Ka një person që mund të bëjë diçka për këtë, dhe ai është presidenti i SHBA-së,” tha Macron.
“Dhe arsyeja pse ai mund të bëjë më shumë se ne, është sepse ne nuk furnizojmë me armë që lejojnë të zhvillohet lufta në Gaza. Ne nuk furnizojmë me pajisje që lejojnë të zhvillohet lufta në Gaza. Shtetet e Bashkuara të Amerikës po.”
Trump mbajti një fjalim të gjerë në Asamblenë e Përgjithshme të Kombeve të Bashkuara të martën, i cili hodhi poshtë lëvizjet e aleatëve perëndimorë për të mbështetur një shtet palestinez, duke thënë se kjo do të ishte një shpërblim për militantët e Hamasit.
“Ne duhet ta ndalojmë menjëherë luftën në Gaza. Ne duhet të negociojmë menjëherë paqen”, tha Trump.
