Ish-presidenti francez, Jacques Chirac, i cili kishte një nga karrierat më të gjata politike në Evropë, ka vdekur sot në moshën 86 vjeç.
Ngushëllime për vdekjen e tij kanë shprehur edhe liderët politikë në Kosovë.
Kryeministri në detyrë, Ramush Haradinaj ka thënë se Kosova do ta kujtojë gjithmonë ish-presidentin Chirac si një përkrahës të fuqishëm të vlerave të lirisë dhe jetës.
“Me keqardhje mësova lajmin për vdekjen e ish Presidentit francez, Jacques Chirac. Kosova do të kujtojë gjithmonë ish Presidentin Chirac si një përkrahës të fuqishëm të vlerave të lirisë dhe jetës, dhe në këtë frymë edhe vendimin për mbështetjen e fuqishme të Republikës së Francës për të ndalur gjenocidin dhe ekzodin e popullit të Kosovës në vitin 1999, për intervenimin e NATO-s kundër agresorit serb udhëhequr nga Millosheviqi. Në emër të popullit të Kosovës, i shpreh ngushëllime popullit të Francës dhe familjes së ish-Presidentit Chirac”, ka shkruar në Facebook, Haradinaj.
Vdekjen e Jacques Chirac, lideri i LDK-së, Isa Mustafa e ka cilësuar si humbje të madhe jo vetëm për Francën por për të gjithë njerëzimin.
“Vdekja e ish-presidentit të Francës, Jacques Chirac, është humbje e madhe, jo vetëm për Francën, por për të gjithë njerëzimin. Presidenti Chirac ishte mik i madh i Kosovës dhe popullit të saj. Ne i jemi mirënjohës Presidentit Chirac për përkrahjen e madhe që i ka dhënë Kosovës dhe besojmë se partneriteti mes Kosovës dhe Francës, i forcuar gjatë udhëheqjes së tij, do të vazhdojë të thellohet mes dy vendeve e popujve tanë. Në këto momente, ndajmë dhimbjen me familjen Chirak, shtetin e Francës dhe popullin mik francez”, tha Mustafa.
Chirac do të mbahet mend ndërkombëtarisht për kundërshtimin e fortë të Francës ndaj pushtimit të Irakut të udhëhequr nga SHBA në vitin 2003.
