Ky është Princi, maçoku përkëdhelës i lagjes “Qafa”, derisa trajtimin dhe kujdesin e ka sikurse emri që e mban.
Historia e tij është mjaft e veçantë, raporton emisioni #gjesi në T7.
Për banorët e kësaj lagjeje, Princi u bë i njohur para disa vitesh, atëherë kur familja Gashi e bëri pjesë të jetës së tyre.
Vite më vonë kjo familje vendosi të shpërngulej nga kjo lagje për në shtëpinë e tyre të re. Sigurisht që me vete e morën edhe maçokun e tyre të dashur, megjithëse kjo shpërngulje doli të jetë tronditëse për të dy palët.
E duke refuzuar të largohej nga lagjja ku ishte rritur, Princi tashmë ka gjetur një shtëpi të dytë, siç është kjo kioskë ku ai e kalon pjesën më të madhe të ditës. Pos kësaj, maçoku i larmë ka rrëmbyer edhe zemrën e pronarit të ri.
Por, këto ditë pandemie nuk ishin aspak të lehta as për Bashkimin. Megjithëse nuk kishte mundësi ta hapte kioskën, ai këtu vinte çdo ditë për ta vizituar Princin.
Pos Bashkimit, Princi duket se ka rrëmbyer zemrat e të gjithë banorëve të lagjes.
Pra historia e Princit dëshmon edhe njëherë se sa e rëndësishme është shtëpia e parë për të gjitha kafshët. Lidhja e emocionale që krijoi është e jashtëzakonshme.
