Gjykata Themelore në Gjakovë ka caktuar masën e paraburgimit ndaj të pandehurit, L.G., i cili dyshohet se ka kryer veprat penale “Vrasje në tentativë” dhe “Përdorim i armës apo mjetit të rrezikshëm”, raporton Gazeta Sinjali.
Ky aktvendim i gjykatës u mor pas kërkesës së Departamentit të Krimeve të Rënda të Prokurorisë Themelore në Gjakovë.
“Prokurori i rastit ndaj të pandehurit, ka kërkuar masën e paraburgimit në afat prej 30 ditësh, e cila është aprovuar nga Gjykata kompetente”, thuhet në njoftimin e kësaj prokurorie.
Sipas prokurorisë, L.G., dyshohet se më 6 gusht, derisa ka qenë në ndikim të alkoolit, me dashje ka tentuar ta privojë nga jeta djalin e tij, A.G., në afërsi të shtëpisë të tyre, në komunën e Rahovecit.
Ai dyshohet që fillimisht i ka kërkuar djalit të tij që të largohet nga shtëpia, e më pas, ka nxjerrë armën e zjarrit nga brezi dhe ka shtënë dy herë në drejtim të tij, por nuk ka arritur që ta qëllojë, sepse djali është larguar shpejt.
Prokuroria vlerëson se me këto veprime i pandehuri ka kryer veprën penale “Vrasje në tentativë”.
Ndërkaq, për shkak se ka përdorur armë zjarri në kundërshtim me ligjet e Kosovës, ai dyshohet se ka konsumuar veprën “Përdorim i armës apo mjetit të rrezikshëm”.
