Presidenti i Turqisë, Recep Tayyip Erdogan, ka paralajmëruar se Izraeli po përpiqet ta tërheqë botën drejt një “katastrofe”, pas një serie sulmesh ajrore ndaj Iranit. Ai i bëri thirrje bashkësisë ndërkombëtare që të ndalë atë që e quajti “banditizëm izraelit”.
Si një kritik i zëshëm i Izraelit dhe përkrahës i fortë i çështjes palestineze, Erdogan akuzoi Izraelin për çuarjen përpara të një strategjie që ka për qëllim “zhytjen e rajonit tonë, veçanërisht Gazës, në gjak, lot dhe paqëndrueshmëri – në një fazë jashtëzakonisht të rrezikshme”.
“Sulmet e Izraelit ndaj fqinjit tonë Iran janë një provokim i qartë që shpërfill të drejtën ndërkombëtare,” tha Erdogan.
Ai shtoi më tej: “Bashkësia ndërkombëtare duhet të ndalë banditizmin izraelit që cenon stabilitetin global dhe rajonal.”
Sipas presidentit turk, qeveria e kryeministrit izraelit Benjamin Netanyahu “po përpiqet të tërheqë rajonin tonë dhe të gjithë botën drejt katastrofës me veprimet e saj të pakujdesshme, agresive dhe të paligjshme”.
