Hysen Çekaj, djali i heroit të Kosovës, Sali Çekajt i është bashkuar Lidhjes Demokratike të Kosovës (LDK).
Aderimin e tij në LDK e ka prezantuar kryetari i kësaj partie, Lumir Abdixhiku, i cili ka bërë me dije se Çekaj do të jetë kandidat për deputet për zgjedhjet e 9 shkurtit të vitit 2025.
“Hysen Çekajn do ta propozoj si kandidat tonin për deputet nga mërgata, përkatësisht nga dega jonë në Gjermani. Si kandidat i mërgatës, ai vazhdon rrugëtimin politik e ideologjik të prindit të tij, heroit Sali Çekaj, në shtëpinë e vetme rugoviste e të demokracisë”, ka shkruar Abdixhiku në “Facebook”.
Postimi i plotë:
Hysen Sali Çekaj, mirë se vjen!
I biri i heroit Sali Çekaj, Hyseni, na u bashkua në rrugëtimin tonë të djathtë. Atë, Valentinën e djalin e tyre Saliun – që mbante me krenari emrin e heroit – i pritëm në LDK së bashku me bashkëluftëtarë të babës së tij, tani bashkëveprimtarë të tij politik.
Hysen Çekajn do ta propozoj si kandidat tonin për deputet nga mërgata, përkatësisht nga dega jonë në Gjermani. Si kandidat i mërgatës, ai vazhdon rrugëtimin politik e ideologjik të prindit të tij, heroit Sali Çekaj, në shtëpinë e vetme rugoviste e të demokracisë.
E djathta po bashkohet po bëhet një.
Në një vend, në një shtëpi, në një rrugëtim!
Hysen Sali Çekaj, shkollimin fillor dhe të mesëm e kreu në Shtutgart, ku dhe diplomoi në Universitetin e Shkencave të Aplikuara. Hyseni aktualisht është ligjërues në shkollën profesionale Dekra Akademi në Shtutgart dhe po ashtu koordinator i shkollave të këtij regjioni.
Hyseni është i martuar me Valentinën dhe ka dy djem, Saliun dhe Malin.
Na priftë e mbara!
