Albert Krasniqi, drejtor i programeve në organizatën Demokraci Plus, tha se kryesuesi i seancës konstituive të Kuvendit, deputeti Avni Dehari po bën kalkulim politik me bllokimin e Kuvendit.
“Në këtë situatë po përdoret zotëri Dehari fatkeqësishtt, kjo pozitë është menduar me shkas për personin më të vjetër në moshë sepse konsiderohet si person që ka një bagazh politik, është në fund të karrierës politike dhe se nuk dëshiron të njolloset në fund dhe të vihet në kompromise apo agjenda të subjekteve politike, por të veprojë mbi palët.
Por që fatkeqësisht, zotëri Dehari nuk është duke e luajtur këtë rol, ai është vënë në një instrumentalizim të subjektit të tij politik dhe ka insistu në një procedurë me një arsyetim të palogjikshëm.
Tha që dështimi për të zgjedhur kryetaren e Kuvendit, propozuar nga Lëvizja Vetëvendosje, zonjën Albulena Haxhiu nuk po jep rezultat votimi i hapur dhe po kaloj në votim të fshehtë, domethënë në mënyrë arbitrare pa pyetur Kuvendin për një mënyrë të tillë të votimit, por drejtpërdrejt në propozimin për anëtarë të komisionit”, tha Krasniqi.
Ai tha se kjo edhe nga Gjykata Kushtetuese u konstatua se është shkelje e mënyrës se si është zhvilluar kjo seancë.
“Dhe tani ka një bllokim trefish të asaj kohe sa dështoi Kuvendi për ta zgjedhur në mënyrë të hapur dhe nëse zotëri Dehari ka dashur në mënyrë autonome dhe pa konsultime të zhbllokojë situatën e zgjedhjes së kryetares së Kuvendit, pse nuk vepron tash, kur Komisioni për votim të fshehtë po dështon një 20 herë dhe ai prapë po insiston në një mënyrë të tillë. Përveç kalulim politik dhe qëllim për bllokim nuk ka emër tjetër”, tha Krasniqi. /BetimipërDrejtësi
