Prokuroria Themelore në Pejë ka ngritur aktakuzë ndaj pesë personave – A.R., L.G., D.T., A.A. dhe F.T. – nën dyshimin për veprën penale “Keqpërdorim i pozitës apo autoritetit zyrtar”, në lidhje me procedurat e marrjes së patentë-shoferit.
Sipas aktakuzës, A.R., në cilësinë e ekzaminerit, nga 18 korriku deri më 22 shtator 2022, ka ndihmuar disa kandidatë gjatë testit teorik duke u treguar përgjigjet e sakta.
L.G., më 18 korrik 2022 në Pejë, si asistent administrativ në njësinë për patentë-shofer, i ka mundësuar një kandidati të paraqitet në provim pa kryer fletëpagesën, duke përdorur një fletëpagesë të vjetër e të pavlefshme, pasi kandidati kishte dështuar disa herë më parë. Kandidati më pas e ka kaluar testin teorik.
D.T., A.A. dhe F.T., nga 6 janari deri më 13 shtator 2022 në Deçan, si zyrtarë të një autoshkolle, u kanë plotësuar disa kandidatëve librezën e orëve të mësimit praktik, duke pretenduar se i kishin kryer, edhe pse ata nuk ndodheshin fare në Kosovë në atë periudhë. Kandidatët më pas kanë hyrë në provimin për patentë-shofer.
Prokurori i rastit, përveç kërkimit të dënimit për të pandehurit, ka propozuar edhe shqiptimin e dënimeve plotësuese si ndalimi i ushtrimit të funksioneve në administratën publike apo shërbimin publik dhe ndalimi i ushtrimit të profesionit, veprimtarisë apo detyrës.
Prokuroria ka theksuar se mbetet e përkushtuar në luftimin e korrupsionit dhe ndjekjen e kryesve të këtyre veprave penale.
