Ministri në detyrë i Shëndetësisë, Arben Vitia, mbrëmë prezantoi masat e reja për parandalimin e përhapjes së koronavirusi në Kosovë.
Në mesin e masave të reja ishte edhe “shtrëngimi” i masës së qarkullimit të njerëzve. Nga 11 orë sa ishte koha e lirë për qarkullim të njerëzve, tani do të jetë vetëm një orë e gjysmë për person.
Por, masa e vjetër për 11 orë do të edhe sot. Nesër, kjo masë do të zëvendësohet me masën e re e cila sipas vendimit të MSH-së do të jetë në fuqi deri më 4 maj.
Qarkullimi i personave fizikë do të bëhet vetëm një herë në ditë, për një orë e gjysmë.
Për personat mbi moshën 16 vjecare lejohet qarkullimi për furnizim me ushqime për familje dhe pagesa bankare për jo më shumë se 1 orë e gjysmë.
’Gjatë qarkullimit nuk lejohet shoqërim nga asnjë person fizik përveç në dy raste. Personat me aftësi të kufizuara dhe personat nën moshën 16 vjeç në prani të kujdestarit”, ka thënë mbrëmë ministri Vitia.
Po ashtu, personave mbi moshën 65 vjeçare u kërkohet të mos dalin nga shtëpitë e tyre, përveç në raste emergjente.
Këto dhe masa të tjera që u prezantuan mbrëmë, sipas ministrit Vitia, po merren me qëllim të parandalimit dhe kontrollit të përhapjes së pandemisë COVID-19.
Kujtojmë që deri tani, në Kosovë janë konfirmuar gjithsej 377 raste të prekura me koronavirus, prej të cilëve 63 janë shëruar, kurse 8 të tjerë kanë ndërruar jetë.
