Kryetari i PDK-së Memli Krasniqi ka vizituar sot Vitinë, e cila udhëhiqet nga kryetari Sokol Haliti në bashkëqeverisje me PDK-në, ku u diskutua për zhvillimet në këtë komunë.
Lideri i PDK-së tha se është i bindur se lidershipi i kësaj komune do t’i realizojë premtimet që i ka dhënë para qytetarëve në kohë fushate.
“Ajo që e vlerësoj shumë është fakti që këtu shoh një vullnet vërtetë të madh për të zbatuar në praktikë gjitha ato zotime që i kanë bërë bashkërisht para qytetarëve dhe jam i sigurt që besimi i qytetarëve të Vitisë, që i kanë mveshur me përgjegjësi edhe njëherë kryetarin e Komunës, por edhe partnerët e koalicionit nga Partia Demokratike e Kosovës, vërtetë do të zbatohet ashtu siç është deklaruar jo vetëm gjatë fushatës, por edhe në angazhimet e tyre ditore”.
Krasniqi kritikoi Qeverinë Kurti duke thënë se po shpërfill realizimin e projekteve me rëndësi të veçantë në Viti, derisa shprehu gatishmërinë dhe vullnetin që brenda mundësive që ka PDK-ja të ndihmojë në përshpejtimin e përfundimit të këtyre projekteve përmes Kuvendit të Kosovës.
“Nuk mund të mos e shpreh shqetësimin për neglizhimin nga ana e qeverisë qendrore për komunat e Kosovës në përgjithësi, por edhe për Komunën e Vitisë në veçanti, sidomos për disa projekte për të cilat para së gjithash në fokus e kanë mirëqenien e qytetarëve, lehtësimin e jetës së tyre. Ato janë të shumta, dhe një prej tyre është edhe ndërlidhja e lokalitetit të Gërlicës me autostradën, e cila do të ishte shumë e rëndësishme për lehtësimin e qarkullimit të njerëzve, të mallërave, që do të ndikonte edhe në zhvillimin ekonomik, por edhe projekte të tjera që vërtetë do të ishin të rëndësishme, që kanë qenë të planifikuara, e që tash janë të penguara”.
Kryetari i Vitisë, Sokol Haliti, tha se e njoftoi liderin e PDK-së lidhur me strategjinë ekonomike lokale, progresin dhe sfidat që po hasin si komunë.
“Kishim kënaqësinë që sot të kemi mysafir kryetarin e Partisë Demokratike të Kosovës, njëherit edhe deputet në Parlamentin e Kosovës, Memli Krasniqi, të cilin e njoftova për ecuritë në komunën tonë, për rrjedhat, punët, progresin, implementimin e projekteve dyvjeçare dhe atyre njëvjeçare, problematikat që po na krijohen e që i kemi në vazhdimësi, dhe tejkalimin e kësaj situate, por edhe për sfidat që ka Komuna e Vitisë”.
