Kryeministri në detyrë, Avdullah Hoti, ka vizituar stadiumin e qytetit të Gjakovës për të parë punimet që janë duke u zhvilluar në renovimin e këtij stadiumi.
Hoti atje ka thënë se ndihet mirë që ky projekt po kompletohet dhe po vazhdojnë punimet në renovimin e stadiumit që i përket kategorisë së katërt për lojë ndërkombëtare dhe që i jep gjallëri qytetit të Gjakovës, njofton Klan Kosova.
“Besoj se me këtë infrastrukturë dhe një rrjet të tërë të infrastrukturës të fushave të tenisit dhe objekteve të tjera që janë në përfundim, po kompletohet e tërë infrastruktura sportive jo vetëm për qytetin e Gjakovës, por për tërë këtë rajonin”.
Në këtë aktivitet kryeministri Hoti ishte i shoqëruar nga ministrja e Kulturës, Rinisë dhe Sportit, Vlora Dumoshi.
Po ashtu, gjatë vizitës në Gjakovë, Hoti ka vizituar edhe disa nga zejet tradicionale të qytetit.
“Zejtaria pasqyron kulturën tonë tradicionale të punës. Veprimtarinë zejtare do ta mbrojmë dhe do ta bëjmë pjesë të trashëgimisë kulturore të mbrojtur nga shteti. Përgëzime të veçanta për këta zejtarë nga Gjakova, që me shumë sfida po i mbajnë gjallë këto veprimtari që janë të rëndësishme për kulturën tonë”.
