Maji i vitit 2016 do të mbahet mend gjatë nga Milot Rashica, që me lot në sy do të largohej nga grumbullimi i kuqezinjve në Baden të
Austrisë, teksa Gianni de Biasi kishte përgatitur listën e kuqezinjve që do të merrnin pjesë në Francë për zhvillimin e Evropianit të parë historik.
Si Rashica, edhe Rrahmani, Gjimshiti dhe Herolind Shala do të “priteshin” nga lista.
Vetëm Gjimshiti do të rikthehej te kombëtarja e Shqipërisë, ndërsa tre të tjerët do të përfaqësonin më vonë Kosovën, duke pranuar festën e Dardanëve.
Altin Lala, menaxheri i Rashicës, kujton atë moment, kur futbollisti nga Vushtrria la kampin e Kombëtares shqiptare në maj të vitit 2016 me lot në sy.
“Ai u largua nga Shqipëria sepse nuk e morën në Europian. Ai do të kishte qëndruar nëse e merrnin. Mendoj se ishte logjike që ai të kalonte te Kosova, pasi aty është vendi ku ka lindur. Futbollistët nuk e mohojnë që janë shqiptarë, por vendosin të luajnë për Zvicrën ose Kosovën, nuk ka ndonjë të keqe, aty e shohin më mirë ata. Ne i futemi politikës dhe pse nuk marrim vesh”, ka thënë Lala për Supersport.
Milot Rashica aktualisht është futbollisti shqiptar me vlerën më të madhe në tregun e futbollit.
