Lëvizja Vetëvendosje dhe Lidhja Demokratike e Kosovës kanë arritur një marrëveshje koalicioni për balotazhin e 9 nëntorit në Komunën e Vushtrrisë.
Kryetari i Lëvizjes Vetëvendosje, Albin Kurti tha se kjo marrëveshje synon bashkëqeverisje pas 9 nëntorit me kandidatin për kryetar të komunës, Sylejman Meholli, dhe ekipin e tij drejtues.
“Le të punojmë jo çdo ditë, por çdo orë që këtë marrëveshje për bashkëqeverisje që e bëmë sot ta realizojmë pas 9 nëntorit me kryetarin Sylejman Meholli dhe drejtorët që do të bëjnë punë të mbara e të mira për të gjithë qytetarët e Vushtrrisë pa dallim, të cilën e duam shumë e edhe ajo na do neve shumë,” tha Kurti.
Ndërkaq, kryetari i Degës së LDK-së në Vushtrri, Xhafer Tahiri, deklaroi se ky koalicion nuk është kundër askujt, por në funksion të së mirës së qytetit.
“Duke qenë një besimtar, unë mendoj se e mira duhet të kthehet me të mirë. Në vitin 2017 VV ka mbështetur ndryshimin në Vushtrri, ndërsa sot LDK e kthen këtë mbështetje me qëllim që të bëhet një ndryshim i domosdoshëm në qytetin e Vushtrrisë,” tha Tahiri.
Me 9 nëntor në balotazh në këtë komunë do të përballen Ferit Idrizi i PDK-së i cili ka marrë 45.33% të votave me Sylejman Mehollin e VV-së me 30.77%.
Xhafer Tahiri i LDK-së, në zgjedhjet e 12 tetorit ka marrë 19.81% të votave.
