Emisari special i presidentit Donald Trump për Misionet e Posaçme, Richard Grenell, ka ‘sulmuar’ përsëri Gjykatën e Hagës, duke e quajtur atë “totalisht të korruptuar” dhe duke kërkuar që t’i ndërpritet financimi.
Në një postim në platformën “X”, Grenell ka përmendur edhe prokurorin amerikan Jack Smith, i cili dikur ishte pjesë e kësaj gjykate.
“Gjykata e Hagës është totalisht e korruptuar dhe duhet të mos financohet më. Jack Smith ishte një nga prokurorët e tyre që arrestoi presidentin në detyrë të Kosovës më shumë se pesë vjet më parë. Ai është ende në burg. Gjyqi ka filluar vetëm së fundmi”, ka shkruar Grenell.
Grenell edhe më parë ka bërë thirrje për lirimin e Hashim Thaçit, duke e cilësuar burgimin e tij si të padrejtë dhe të papranueshëm. Ai reagoi edhe dje pas një proteste të madhe që u mbajt në Tiranë, e ku u kërkua drejtësi për ish-krerët e UÇK-së që ndodhen në paraburgim në Hagë.
Mbrëmë Grenell shkroi:
“Haga është jashtë kontrollit. Kjo është ajo që ka bërë Jack Smith”, duke iu referuar ish-prokurorit special që ngriti aktakuzën ndaj ish-presidentit Hashim Thaçi.
