Pavarësisht kërkesës së qartë të aleatit kryesorë të Kosovës që është SHBA, Lista Serbe nuk u certifikua.
Me dy vota për, dy kundër dhe shtatë abstenime, kjo parti nuk mori mbështetjen nga anëtarët e KQZ-së të enjten.
Ishin anëtarët e Lëvizjes Vetëvendosje në KQZ, Sami Kurteshi e Alban Krasniqi, që votuan kundër, ani pse gjatë ditës, e ngarkuara me punë në Ambasadën e Shteteve të Bashkuara të Amerikës, Anu Prattipati, në një takim me kryeministrin në detyrë shprehu pikërisht shqetësimin për moscertifikim të partive të komunitetit serb.
Ndaj këtij veprimi, ka reaguar deputetja e LDK’së, Hykmete Bajrami.
Ajo e ka cilësuar patriotizëm të rremë qëndrimin dhe deklaratat e anëtarëve të Lëvizjes Vetëvendosje në kundërshtim të certifikimit të Listës Serbe për pjesëmarrje në zgjedhjet e 12 tetorit.
“Hajnitë, dështimet, tenderët njëburimorë, nepotizmi, kapja e institucioneve dhe lidhjet me mafinë energjetike, NUK mund t’i mbuloni me patriotizëm të rremë, as me Serbinë, as me urat që po i ndërtoni dhe as me Listën Serbe. Ju jeni të njëjtit që Radojçiqit i keni krijuar korridor dhe ka ikur në pikë të ditës, nën vëzhgimin e kamerave, dhe nuk e keni shpallur Listën Serbe organizatë terroriste as pasi ata e kanë marrë përgjegjësinë për sulmin terrorist në Banjskë. Sot po i luani patriotët – hipokrita!” ka shkruar Bajrami në Facebook.
Ndërsa Eugen Cakolli, hulumtues i lartë në Institutin Demokratik të Kosovës, ka thënë se vendimi i Komisionit Qendror të Zgjedhjeve për të mos e certifikuar Listën Serbe do të rrëzohet nga Paneli Zgjedhor për Ankesa dhe Parashtresa.
“KQZ-ja, edhe një herë tjetër, në ndjekje të diskurseve partiake, e ktheu administrimin e zgjedhjeve në teatër politik. Vendimi i sotëm për të mos certifikuar Listën Serbe nuk është gjë tjetër veçse një akt politik, i cili do të rrëzohet nga PZAP-ja…”, tha ai ndër të tjera.
Edhe Misioni i OSBE-së në Kosovë ka reaguar pas moscertifikimit të Listës Serbe për zgjedhjet lokale të 12 tetorit.
Në një komunikatë, OSBE-ja ka thënë se po minohet pluralizmi demokratik.
“Përjashtimi i akterëve politikë minon pluralizmin demokratik, dobëson besimin në institucione dhe zvogëlon mundësitë për të gjitha komunitetet që të përfaqësohen në mënyrë të drejtë. Misioni thekson se pjesëmarrja e plotë dhe e vërtetë e të gjitha komuniteteve në procesin zgjedhor është thelbësor për qëndrueshmërinë, integritetin dhe stabilitetin afatgjatë demokratik”, thuhet në komunikatë.
Kurse njohësi i çështjeve politike, Ilir Deda ka thënë se të gjitha partitë u bashkuan rreth “tallava patriotizmit”.
Ndryshe, zgjedhjet lokale do të mbahen më 12 tetor.
