Një ngjarje e rëndë ka tronditur qytetin e Prizrenit në orët e hershme të mëngjesit të së martës. Një shtetas turk, banor i këtij qyteti, dyshohet se ka sulmuar me thikë dy vajzat e tij të mitura, të moshës 15 dhe 10 vjeçare.
Sipas Policisë së Kosovës, vajza 15-vjeçare ka ndërruar jetë në vendin e ngjarjes si pasojë e plagëve të marra, ndërsa motra e saj 10-vjeçare ndodhet në gjendje të rëndë shëndetësore dhe është dërguar për trajtim në Qendrën Klinike Universitare të Kosovës (QKUK).
Zëdhënësi i Policisë për rajonin e Prizrenit, Shaqir Bytyqi, ka konfirmuar për mediat se autori i dyshuar ka plagosur edhe veten pas sulmit dhe aktualisht ndodhet nën trajtim mjekësor në Spitalin Rajonal të Prizrenit.
Ai është arrestuar nga autoritetet dhe po trajtohet nën mbikëqyrje policore.
“Sot rreth orës 05:58, policia ka marrë informatë për një person të lënduar në rrugën ‘Shotë Galica’ në Prizren. Në vendin e ngjarjes janë dërguar katër patrulla policore dhe kanë gjetur tre persona të lënduar.
Dyshohet se babai ka sulmuar me thikë dy vajzat e tij, njëra nga të cilat ka vdekur në vend, ndërsa tjetra është në gjendje të rëndë. Po ashtu, i dyshuari ka plagosur edhe veten”, deklaroi Bytyqi.
Të tre të përfshirët në këtë rast janë shtetas turq me qëndrim në Prizren. Rasti është duke u hetuar nga autoritetet për zbardhjen e plotë të motivit dhe rrethanave të tragjedisë.
