Shkrimtari Rexhep Qosja duket se e ka pjesë të karakterit dëshirën për t’u bërë shërbëtor i pushteteve. E kishte nisur me himnet për Josip Broz Titon, kur me “penën e mprehtë” ia numëronte meritat për “çlirimin e popujve të Jugosllavisë”, duke vazhduar me konformizmin ndaj konjukturës komuniste në Kosovë, në krye me Fadil Hoxhën, për të vazhduar me elozhet për Hashim Thaçin, i cili si shpërblim ia ndante qindra mijëra euro për ta financuar ribotimin e veprës së tij.
Duket se dëshira për t’iu shërbyer pushteteve nuk po i venitet as në moshë të shtyrë. Sot ai doli publikisht në mbështetje të Albin Kurtit dhe Lëvizjes Vetëvendosje.
Rexhep Qosja u lajmërua sot, duke treguar se do të votojë në zgjedhjet parlamentare të 9 shkurtit.
Akademiku që nuk ka votuar që nga viti 2000, atëherë kur kishte dështuar t’i merrte qoftë edhe pak elektorat LDK-së së Ibrahim Rugovës, e cila gëzonte mbështetje të madhe.
Qosja, i cili e quante Rugovën tradhtar dhe njeri të Sllobodan Millosheviqit, tregoi vetë sot se nuk ka votuar prej atëherë kur oponenti i tij politik ishte Rugova, lideri ikonik i shqiptarëve të Kosovës.
“Ky mesazh më nxiti ta kujtoj herën e parë dhe të fundit kur e kam ushtruar të drejtën e votimit në Kosovë. Ishte viti 2000”, shkroi ai, duke shpërndarë një mesazh që ia kishte dërguar Komisioni Qendror i Zgjedhjeve për mundësinë e ndërrimit të qendrës së votimit.
Ndërsa tregoi se nuk kishte votuar për rreth 25 vjet, një kontradiktë vihet në pah pak fjali më poshtë, kur thotë se do të votojë këtë herë sepse “votimi, sidomos në zgjedhjet e përgjithshme, shtetërore, është obligim shoqëror, kulturor, etik e kombëtar”.
Meqenëse votimi qenka “obligim shoqëror, kulturor, etik e kombëtar”, pse nuk e paska përmbushur Qosja atë për rreth 25 vjet.
