Antoviq pranon fajësinë për sulm ndaj KFOR-it, Prokuroria propozon dënim prej 5 vjetësh burgim
I akuzuari për sulm ndaj pjesëtarëve të KFOR-it në Zveçan, Millosh Antoviq dhe Prokuroria Speciale kanë arritur marrëveshje për pranimin e fajësisë.
Këtë e ka konfirmuar për Klankosova.tv Arbnora Luta, zëdhënëse e Prokurorisë Speciale.
Antoviq është pajtuar me akuzat për veprat penale “Sulm ndaj personit zyrtar”, “Pjesëmarrje në turmë që kryen vepër penale – huliganizëm”, “Blerje, posedim, shpërndarje dhe shitje e paautorizuar e narkotikëve” dhe “Posedim i paautorizuar i armëve”.
“Prokuroria Speciale bazuar në marrëveshjen e arritur ka propozuar dënim unik prej pesë vitesh burgim efektiv dhe 20 mijë euro gjobë”, thuhet në përgjigjjen e Lutës.
