Presidentja Vjosa Osmani e ka shpallur 28 dhjetorin si datën për zgjedhjet e reja, pas dekretit që nënshkroi për shpërndarjen e Kuvendit.
Ajo tha se meqë nuk pati vullnet politik, shpërndarja e Kuvendit ishte zgjidhja e vetme.
Osmani i përjashtoi datat tjera që janë propozuar, teksa datën që e caktoi bëri me dije se e kanë propozuar tetë parti.
Osmani përjashtoi datën 21 dhjetor, me arsyetimin se KQZ-së i duhet kohë për të gjitha përgatitjet për zgjedhjet e jashtëzakonshme. E para e vendit tha se “një president i përgjegjshëm zgjedh datën më të mirë, pavarësisht dëshirave që mund të shprehen”.
“Kam qenë në kontakt edhe me kryetarin e KQZ-së tri dhe kemi analizuar procedurat që na presin për organizimin e zgjedhjeve nacionale. Zgjedhjet lokale nuk kanë përfunduar akoma sa i përket procedurës së certifikimit.
Ekzistojnë pastaj afatet e ankesave dhe pas kësaj fillojnë procedurat e asgjësimit të materialit zgjedhor e pastaj procedurat e përgatitjes së platformës për shpalljen e rezultateve preliminare dhe atyre të numërimit, të cilat pastaj duhet të ripërtrihen me parametrat e zgjedhjeve të përgjithshme.
Para fillimit të fushatës janë edhe një sërë veprimesh, si regjistrimi i subjekteve dhe certifikimi i kandidatëve, hedhja e shortit e veprime të tjera. Për më tepër duhen së paku dy javë hapësirë kohore për të mundësuar votimin jashtë vendit, dhe duhet pasur parasysh që sipas ligjit të ri për zgjedhjet, shtetasve që jetojnë jashtë vendit, duhet dhënë së paku 15 ditë afat me qëlluam të aplikimit dhe regjistrimit për të votuar. Të gjitha këto e bëjnë të pamundshme datën 21 dhjetor.
“Rrjedhimisht, data 28 është data që kam vlerësuar se mbetet e vetme e mundshme edhe pse edhe kjo paraqet sfidë për KQZ-në”, tha Osmani ndër të tjera.
