Zyra e Rregullatorit të Energjisë (ZRrE), ka bërë të ditur se ende nuk është marrë një vendim për rritjen e tarifave të energjisë.
“Zyra e Rregullatorit të Energjisë (ZRrE) dëshiron të sqarojë opinionin publik se aktualisht nuk është marrë asnjë vendim për rritjen e tarifave të energjisë. Me qëllim që të sigurohet transparencë dhe të krijohet mundësia e një dialogu të hapur nga të gjitha palët e interesuara, ZRRE-ja ka vendosur të ndajë për konsultim publik Raportin Konsultativ për të Hyrat e Lejuara Maksimale”, thuhet në njoftimin e ZRrE-së, transmeton Klankosova.tv.
Ajo bën të ditur se edhe sot të gjitha palët e interesuara mund të paraqesin komentet dhe sugjerimet e tyre mbi raportin e publikuar të tyre.
“Në kuadër të përpjekjeve për të garantuar një proces të hapur dhe transparent, ZRRE-ja fton të gjitha palët e interesuara – përfshirë konsumatorët, organizatat e shoqërisë civile, bizneset, që të paraqesin komentet dhe sugjerimet e tyre mbi raportin e publikuar deri më 28 mars. Ky proces është një mundësi për të siguruar që çdo vendim të marrë të bazohet në mendime të shumta dhe të ndihmojë në krijimin e një sistemi të drejtë dhe të balancuar për të gjithë”, thuhet tutje në njoftim.
Për rritjen e tarifës së energjisë elektrikë për 15 për qind, nuk po pajtohen qytetarët e Kosovës.
Disa aktivistë kanë bërë thirrje për protestë masive më 5 prill, madje presin që shumë të tjerë do t’iu bashkëngjiten.
Sakaq, gjatë ditës së enjte, aktivisti Dibran Hoxha i bëri një “dhuratë” kryetarit të ZRrE-së, Ymer Fejzullahut.
Tortën e përbërë nga “15%”, nuk e pranoi Fejzullahu, e Hoxha nuk përtoi ta “sulmonte” me të.
