Presidenti Volodymyr Zelensky ka parashikuar se presidenti rus Vladimir Putin “do të vdesë së shpejti” mes thashethemeve që qarkullojnë për shëndetin e lig të liderit rus.
Komentin Zelensky e bëri gjatë një interviste me gazetarët në Paris pas takimit të tij me presidentin francez Emmanuel Macron dje.
Ukrainasi, 47 vjeç, iu lut Shteteve të Bashkuara të Amerikës që të “qëndrojnë të forta” dhe të mos i nënshtrohen kërkesave të Moskës, duke thënë se “Ai [Putini] do të vdesë së shpejti, dhe ky është një fakt dhe do të marrë fund”.
Thashethemet rreth gjendjes shëndetësore të liderit rus kanë marrë hov prej vitesh, pasi ai është parë shpesh me fytyrë të fryrë, sy të gjakosur, duke përjetuar dridhje dhe kërcitje të këmbëve, ndërsa në disa raste ai është shfaqur gjithashtu duke çaluar.
Vetëm javën e kaluar u raportua se Putini, 72 vjeç, pësoi një “goditje të vogël” pasi u pa duke u dridhur në mënyrë të pakontrolluar gjatë një konference.
Ka pasur pretendime se ai mund të ketë kancer dhe sëmundjen e Parkinsonit – por këto nuk janë verifikuar.
Gjatë takimit të djeshëm, Zelensky tha se ai beson se Putini po përpiqet të “godasë Bashkimin Europian nga brenda”, duke iu referuar Hungarisë, e cila është në anën e Rusisë.
Duke folur pas takimit, Macron tha se një forcë paqeruajtëse europiane e instaluar në Ukrainë mund të “përgjigjet” nëse Rusia fillon një sulm.
