Presidenti ukrainas, Volodymyr Zelensky thotë se më shumë se 46,000 ushtarë ukrainas janë vrarë që nga pushtimi i plotë i Rusisë në shkurt 2022, me “dhjetëra mijëra të tjerë të zhdukur në aksion ose në robëri”.
Ata të zhdukur në aksion mund të jenë të vdekur ose në robëri, tha Zelensky për NBC News të dielën.
Dhjetë ditë më parë, më 6 shkurt, Zelensky tha se 45,100 ushtarë ukrainas ishin vrarë dhe rreth 390,000 ishin plagosur. Ekspertët ushtarakë në Ukrainë dhe në Perëndim besojnë se numri mund të jetë shumë më i lartë.
Zelensky tha gjithashtu se 19,500 fëmijë ukrainas janë dëbuar në Rusi.
Rusia nuk ka publikuar humbje në fushën e betejës, por Inteligjenca Mbrojtëse e Mbretërisë së Bashkuar vlerësoi në dhjetor se mesatarisht 1,523 ushtarë rusë vriteshin dhe plagoseshin çdo ditë.
Zelensky thotë se deri në 350,000 ushtarë rusë janë vrarë – raporte të tjera sugjerojnë se numri mund të jetë shumë më i lartë./21Media
