Presidenti i Serbisë, Aleksandar Vuçiq, në një intervistë per mediet serbe, ka kërcënuar duke thënë se do shtohet numri i shteteve që do e tërheqin njohjen diplomatike të Kosovës, derisa është shprehur se është i dëshpëruar me Greqinë, nën vazhdën e raportimeve se ky shtet do e njeh Kosovën.
Vuçiq, në intervistë për B92, nuk ka lënë pa përmendur as presidenten e Kosovës, Vjosa Osmani, e as kryeministrin Albin Kurti, duke i quajtur si “skifterë të mëdhenj shqiptarë”
“Por skifterët e politikës së Madhe Shqiptare erdhën në pushtet, duke shijuar simpatitë e mëdha të Perëndimit, veçanërisht Gjermanisë, jo aq shumë të Amerikës, sepse ata e shohin Ministrin e Punëve të Jashtme në Prishtinë si të tyren. Osmani është një studente amerikane, Kurti është i martuar për një norvegjez. Këta janë skifterët shqiptarë, që disa i paraqesin si njerëz të mirë”, ka deklaruar ai.
“Do ta shihni se sa vende do ta tërheqin njohjen [ndaj Kosovës]. Dhe pastaj do të shihni se si një Serbi e vogël po lufton si “miu në qoshe”, siç thotë një doktrinë britanike, ne do të luftojmë ashtu siç dimë”, ka kërcënuar Vuçiq.
“Është e rëndësishme për ne që të mos ketë panik për Serbinë, ne e dinim që kështu do të ndodhte. Së pari, ata krijuan një zyrë për marrëdhënie tregtare kur shqiptarët futën taksa të paligjshme, dhe pastaj të premten në pesë pasdite u informuam nga Greqia se ata do të përmirësonin më tej bashkëpunimin”, ka deklaruar tutje ai.
