Pasi presidenti i Turqisë, Recep Erdogan, tha se bashkë me presidentin e SHBA-së, Joe Biden do të lobojnë për njohje të reja për Kosovën, ka reaguar Aleksandar Vuçiq.
Vuçiq tha sot se Serbia do të kundërshtojë nëse do të nis një lobim i ri nga Turqia për njohjen e pavarësisë së Kosovës.
“Turqia është fuqi, Erdogani është lider i madh, unë jam i vogël dhe Serbia është më pak e rëndësishme, por nuk është aq e vogël që të mos mundohet të rezistojë, pasi po e mbrojmë tonën. Kjo (Kosova v.j.) nuk është (tokë v.j.) turke, nuk ka qenë dhe nuk do të jetë. Na mbetet ta mbrojmë. Ne alternativë nuk kemi. Do të mbrojmë popullin në Kosovë, do të shihni edhe këtë se nuk jemi edhe aq të vegjël”, ka thënë Vuçiqi.
