Që kur vëzhguesit e ODHIR-i dhe Parlamentit Evropian dolën me vlerësimet e tyre paraprake për procesin zgjedhor në Serbi, sulmet e presidentit Aleksandar Vuçiq ndaj tyre nuk kanë të ndalur.
Eurodeputeti austriak dhe vëzhgues i zgjedhjeve në Serbi, Andreas Shider, është më së shpeshti në shënjestër të autoriteteve, dhe shigjetat helmuese janë drejtuar edhe ndaj “mysafirëve nga jashtë” të tjerë që kanë dhënë mendimin e tyre për garën zgjedhore, transmeton Ballkani.info.
Profesori i Fakultetit të Shkencave Politike, Dushan Spasojeviq tha për portalin Nova.rs se sulmet synojnë të inkurajojnë Vuçiqin dhe mbështetësit e tij, por edhe të shërbejnë si një lloj negocimi mes tij dhe aktorëve ndërkombëtarë në lidhje me raportin përfundimtar të ODIHR-it.
Vetëm një ditë pas zgjedhjeve të 17 dhjetorit, ODIHR doli me një vlerësim paraprak se zgjedhjet në Serbi u shënuan nga parregullsi të rënda, keqpërdorime të fondeve publike, dominim mediatik i presidentit të vendit Aleksandar Vuçiq, fushata negative dhe përhapje frike.
“Ne kemi thënë në raportin paraprak se votuesit janë sjellë nga vende të tjera për të votuar në zgjedhjet lokale në Beograd, e kemi vërejtur këtë”, tha kreu i ODIHR, Albert Johnson.
Të njëjtën gjë e panë edhe vëzhguesit e Parlamentit Evropian, ndërsa njëri nga anëtarët e delegacionit, Andreas Shider, tha se nuk e kishte parë kurrë atë që kishte parë në zgjedhjet në Serbi.
Për shkak të një deklarate të tillë u vu në lëvizje makineria propagandistike e presidentit Aleksandar Vuçiq dhe ishte ai që dha goditjen me deklaratën se Shideri vodhi kryetarin e partisë së tij në Austri dhe erdhi Serbi për të “kripur mendjen”.
“Njëri filloi të muhabet dhe shpejt pushoi së foluri… Ata shkuan në qendrat e votimit dhe nuk panë ndonjë parregullsi, por më pas e panë në rrjetet sociale… E vodhën kryetarin e partisë së tyre në Austri, dhe erdhën këtu të na bëjnë hile?”, tha Vuçiq.
Pas akuzave ndaj Shiderit, mediat pro regjimit filluan të shkruajnë edhe për bashkëshorten e tij Sonja Vesela Shider.
I pyetur për të komentuar sulmet që vijnë nga kreu i shtetit serb, Shider tha se nuk i kushton rëndësi asaj që vjen nga zyrtarët nga Beogradi.
“Të gjithë e dinë se kjo që thonë është absurditet i plotë. Ata e bëjnë këtë sepse janë nervozë dhe sepse e dinë që kritikat e të gjithë vëzhguesve nga Evropa janë reale. Sinqerisht, nuk do t’i komentoja më tej deklaratat e tyre, sepse i shoh si një sinjal të nervozizmit të tyre”, shpjegon Shider.
Shider nuk ka dyshim se në fund të fundit, kur bëhet fjalë për parregullsitë zgjedhore, do të duhej të pasonte një reagim më specifik nga Bashkimi Evropian.
“Mendoj se ka një reagim të fortë dhe duhet të vijë nga presidentja e Komisionit Evropian, Ursula von der Leyen. Ajo pritet të mbajë një qëndrim të qartë për protestat në Serbi. Gjithashtu, duhet theksuar se këto janë protesta serbe ku populli i Serbisë kërkon të drejtat e veta dhe se nuk duhet të ketë vend për ndërhyrje të huaja, pasi dëgjuam se shërbimet ruse kishin ndikim të fortë te presidenti Aleksandar Vuçiq. Kjo duhet të na shqetësojë jo vetëm ne nga Bashkimi Evropian, por të gjithë avokatët e demokracisë në Serbi”, shpjegon Shider.
Vuçiq drejtoi shigjeta helmuese në drejtim të ODIHR-it, duke i akuzuar se e dinin paraprakisht se opozita nuk do të njihte rezultatet e zgjedhjeve, çfarëdo qofshin ato, gjë që lidhet me ngjarjet e së dielës.
“Pyes kreun e OSBE-së në Beograd, Jan Bratu dhe e pyes kreun e delegacionit të ODIHR-it – A u kanë thënë dhe kush i ka thënë? E dimë edhe kujt dhe kur i thanë” dhe shtoi, “dhe atëherë do t’ju vërtetoj se e dinin, thjesht heshtën, sepse mendonin se nëse kalon, kalon. Dhuna nuk mund të kalojë”, tha Vuçiq.
Një profesor në Fakultetin e Shkencave Politike i vlerëson ato sulme si diçka të zakonshme dhe në mënyrën e presidentit Aleksandar Vuçiq.
“Mendoj se këto sulme janë ose reagime të Vuçiqit ndaj deklaratave të vëzhguesve ose njerëzve të ndryshëm nga bashkësia ndërkombëtare, diçka që është klasike e Vuçiqit. Ai grindet me njerëz që nuk janë në dhomë me të dhe debaton me përfaqësuesit më të ulët dhe është shumë servil ndaj kryeministrave apo ministrave që vijnë nga vende të njëjta apo të ngjashme. Tani thjesht çështja është më e ashpër dhe më e dukshme, sepse trajton tema konkrete dhe gjithnjë e më shumë zëra kritikë rreth zgjedhjeve. Por ky është Vuçiq klasik, vetëm tani ai është nën vëzhgim”, shpjegon Spasojeviq.
