Vjosa Osmani nga e shtuna ka mbetur anëtare e thjeshtë e LDK-së. Kryeparlamentarja është shkarkuar nga pozita e nënkryetares së partisë dhe anëtares së kryesisë.
Me shumicë votash, anëtarët e Këshillit të Përgjithshëm të LDK-së ia treguan derën Osmanit, pasi kjo e fundit nuk e votoi qeverinë e Avdullah Hotit dhe ishte në linje me VV-në dhe Albin Kurtin në momentin e votëbesimit të Qeverisë Kurti.
Osmani u kritikua nga anëtarët e LDK-së për qasjen kundër partisë së saj dhe bashkërendimit të aktiviteteve me VV-në dhe Kurtin.
Megjithatë, duket se Osmani tashmë e ka ndarë mendjen që të largohet përfundimisht nga LDK-ja. Në një far formë këtë e kishte paralajmëruar edhe vetë ajo në postimin në Facebook pak pas shkarkimit. “Shihemi në zgjedhje”, kishte shkruar ajo.
Burime të Ballkani.info bëjnë të ditur se Osmani tashmë është në proces të krijimit të një partie të re.
“Ajo (Vjosa) tashmë është në process e sipër të themelimit të partisë së saj, që në fillim do të jetë më shumë si një iniciativë politike”, ka thënë një burime i afërt me LDK-në.
Sipas tij, shumë gjëra janë kryer dhe se partia/iniciativa e Osmanit e ka të përfunduar edhe logon.
Ballkani.info po ashtu merr vesh se ka gjasa që pjesë e entitetit të ri politik në Kosovë të drejtuar nga Vjosa Osmani të jetë edhe Mimoza Kusari-Lila.
Mimoza Kusari aktualisht është deputete e Grupit Parlamentar të VV-së, por e drejton një parti të vogël të quajtur Alternativa.
Këtë parti, Kusari-Lila e kishte formuar me Ilir Dedën, por gjatë rrugës u përplasen dhe në fund u ndanë.
Vjosa Osmani pretendon se pas vetës i ka edhe disa deputetë të LDK-së. Në mesin e tyre është Haxhi Avdyli, i cili hapur ka dalë në mbështetje të Osmanit.
