Kryeshefi ekzekutiv i Termokosit, Fisnik Osmani, ka njoftuar për një takim të frytshëm me Përfaqësuesin e Përhershëm të UNDP-së në Kosovë, z. Nuno Queirós, i cili vizitoi ndërmarrjen për të diskutuar bashkëpunimin e ardhshëm në projekte strategjike.
Vizita u përqendrua në mundësitë e mbështetjes nga UNDP për rritjen e efikasitetit energjetik, digjitalizimin e shërbimeve, zvogëlimin e emetimeve të karbonit dhe promovimin e burimeve të ripërtëritshme të energjisë në kryeqytet.
“Termokos po punon pandërprerë për të qenë një nga aktorët kryesorë të ekonomisë së gjelbër në Kosovë,” u shpreh Osmani, duke shtuar se partneritete si ai me UNDP janë kyçe për arritjen e një sistemi më të pastër dhe të qëndrueshëm të ngrohjes për qytetarët e Prishtinës.
Nga ana e tij, z. Queirós vlerësoi përpjekjet e Termokosit për modernizimin e sistemit të ngrohjes dhe theksoi gatishmërinë e UNDP-së për të mbështetur më tej projektet që ndihmojnë në avancimin e agjendës së gjelbër dhe përmirësimin e jetesës në Kosovë.
Kjo vizitë përfaqëson një hap të rëndësishëm drejt një bashkëpunimi afatgjatë mes Termokosit dhe UNDP-së, në funksion të ndërtimit të një të ardhmeje më të qëndrueshme për të gjithë qytetarët.
