Agjencia e spiunazhit të Koresë së Jugut ka konfirmuar raportet ukrainase se një ushtar i plagosur i Koresë së Veriut është kapur nga forcat ukrainase, në atë që mund të jetë rasti i parë i këtij lloji që kur Pheniani kishte dërguar forca luftarake për përforcim të forcave ruse në luftën në Ukrainë.
Shërbimi Informativ Kombëtar i Koresë së Jugut tha në një deklaratë të premten: “Përmes shkëmbimit të informacionit në kohë reale me agjencinë e inteligjencës së një vendi aleat, është konfirmuar se një ushtar i plagosur koreano-verior është kapur”.
Një foto e ushtarit koreano-verior, i cili dukej i dobësuar dhe dukej se ishte plagosur, qarkulloi në aplikacionin e mesazheve Telegram, sipas agjencisë së lajmeve të Koresë së Jugut Yonhap. Nuk dihen detaje për gjendjen apo statusin e ushtarit, shkruan The Guardian, transmeton Gazeta Express.
Pretendimi doli pasi media ukrainase Militarnyi raportoi se forcat speciale kishin kapur ushtarin në rajonin Kursk të Rusisë, ku disa territore janë kapur dhe mbajtur gjatë një inkursioni nga Ukraina.
Gazeta nuk tha se kur kishte ndodhur incidenti dhe nuk ka pasur asnjë konfirmim nga zyrtarët në Ukrainë apo Korenë e Veriut, ku media shtetërore nuk ka përmendur vendosjen e trupave atje.
Militarnyi tha se, nëse konfirmohet, ushtari do të ishte luftëtari i parë i Koresë së Veriut që do të kapej nga forcat ukrainase.
Rreth 11,000 ushtarë nga Koreja e Veriut janë dislokuar për të ndihmuar homologët e tyre rusë, disa muaj pasi udhëheqësi i vendit, Kim Jong-un dhe presidenti rus, Vladimir Putin, nënshkruan një pakt të mbrojtjes reciproke që angazhonte secilin vend t’i vinte në ndihmë tjetrit nëse sulmohet.
