Pas tre ditësh agonie dhe vuajtje, të mërkurën e 11 qershorit në spitalin e Padovës ka humbur jetën 58-vjeçari shqiptar, Fatos Cenaj, i goditur me disa plumba në kokë mëngjesin e së dielës.
Plagët e marra ishin tepër të rënda. Mjekët që e morën nën kujdes menjëherë pas ngjarjes, tentuan gjithçka për ta shpëtuar, por dje deklaruan se ish-polici shqiptar ka vdekur, shkruan Top Channel.
Ngjarja ndodhi të dielën në mëngjes, më 8 qershor, në rrugën Casoni Basse. Viktima ndodhej në një tricikël duke shkuar në punë, kur vetëm disa kilometra larg shtëpisë u qëllua me dy plumba pas koke.
Karabinierët e Njësisë Hetimore të Padovës vazhdojnë të hetojnë për zbardhjen e rastit.
Prokurori që ka në dorë dosjen e hetimeve, përveç autopsisë, me shumë mundësi do të kërkojë edhe një ekspertizë balistike për të kuptuar trajektoren e plumbit, nga çfarë distance është qëlluar dhe me çfarë arme.
Aktualisht nuk ka dëshmitarë dhe nuk ka kamera sigurie që mund të ndihmojnë hetuesit. Detaji i vetëm është se vrasja ka ndodhur në një zonë bujqësore të Fontanivës, ku të dielën në mëngjes një kalimtar, pa një person të shtrirë në kanal pranë triçiklit të tij dhe mendoi se Cenajt i kishte rënë të fikët ose kishte pasur një aksident rrugor.
Kur ekipet mjekësore mbërritën, kuptuan menjëherë se bëhej fjalë për diçka shumë më serioze. Të gjitha skenarët mbeten të hapura: nga një e shtënë aksidentale nga ndonjë gjuetar, deri te një atentat i qëllimshëm.
