Gjermania pritet të kërkojë ekstradimin e të paktën 6 personave të cilët dyshohet se mashtruan me “Call Center”,
Xhami i derës së vjetër është ende i thyer para objektit.
Kurse të resë, i është vënë dryni.
Kjo pasi në këtë objekt para 10 ditësh Policia e Kosovës së bashku me atë të shtetit gjerman, morën aksion për të mbyllur një “Call Center” që gjendej aty.
Aksioni u zhvillua në gjithsej 17 lokacione ku nga ky aksion mbetën të arrestuar 18 persona të cilët i përkasin moshës 22 deri në 45 vjeç.
Ndaj tyre është caktuar masa e paraburgimit prej 1 muaj.
E nën arsyetimin se qytetarët e mashtruar nga këta ‘’Call Center’’ janë shtetas gjermanë, Prokuroria e Përgjithshme në Bamberg të Gjermanisë tha se kërkon ekstradimin e të paktën 6 personave.
Megjithatë kërkesa që pritet të dërgohet nga Prokuroria Gjermane si legjitime po konsiderohet nga juristët, edhe pse thonë se Kosova dhe Gjermania nuk kanë marrëveshje ekstradimi.
E që ky ekstradim të ndodhë duhet që shteti gjerman t’i bëjë kërkesë zyrtare shtetit të Kosovës.
Nëse shpallën fajtor të akuzuarit mund të dënohen deri në 10 vjet.
Ditë më parë Prokuroria Themelore në Kosovë ka bërë të ditur se janë sekuestruar edhe afro 1.7 milionë euro.
