Trajneri i Ballkanit, Ilir Daja është ankuar se gjatë tërë ndeshjes derbi me Prishtinën e kanë fyer disa tifozë që qëndronin prapa bankinës së skuadrës mysafire në stadiumin “Fadil Vokrri” në Prishtinë.
Trajneri shqiptar ka mbetur i zhgënjyer edhe me sjelljen e një polici, i cili sipas tij nuk ka bërë asgjë për t’i ndalur këta tre trifozë, përkundër faktit se kërkoi nga ai që t’i largonte prej aty.
Gjithashtu, trajneri historik i Ballkanit shtoi se sharjet u bënë edhe në prani të vëzhguesit të lojës, shkruan “Gazeta Express”.
“Prishtina bëri futboll të mirë. Por loja ishte thuajse e barabartë. Barazimi ishte rezultati më i drejtë i asaj që ofroi loja”, ka thënë Daja lidhur me ndeshjen. Ai ka vlerësuar atmosferën, por është ndalur te tre individët. “Janë tre veta që shajnë vazhdimisht. Të prishin këtë lloj imazhi të Prishtinës, me praninë e policisë, vëzhguesit, është e papranueshme”, tha fillimisht Daja.
“Më pas ishte një polic që bëri një gjest që nuk i shkon policit. Këta tre në mënyrë të vazhdueshme pas bankinës time kanë qëndruar. Edhe policia duhet të ndërhyj për t’i nxjerr jashtë stadiumit. Unë do ta kërkoj të drejtën time. Tifozët e tjerë të Prishtinës i përshëndes pasi e kanë përkrahur skuadrën e tyre”, vazhdoi trajneri shqiptar.
