Infektologu, Ilir Tolaj, hodhi akuza ndaj Qeverisë Kurti për situatën e rëndë me koronavirus që është krijuar në Kosovë, siç tha ai, për shkak të veprimit të ngadaltë të qeverisë dhe heqjen e masave për shumë aktivitete.
Ai tha se lejimi i dasmave, lokaleve të natës dhe disa aktiviteteve të tjera çoi në rritjen e shifrave të infektimeve. Sipas mjekut Tolaj, Kosova është në situatën kur duhet mbyllur sërish.
“Lirimi i masave në përmasat që ishin në Kosovë është një prej shkaqeve se përse kemi një situatë të tillë më valën e katërt të pandemisë dhe përhapja e Deltës e ka bërë të veten. Qeveria veproi në mënyrë të ngathtë, të vonuar edhe kur rastet nisën të shtohen, lejoi lokalet e natës dhe kafeteritë me orar të gjatë.“
“Asnjë nga këto veprimtari nuk u shoqërua me masa minimale antiCOVID. Në Kosovë, duke lejuar punën e disa segmenteve ne tashmë po përballemi me pasoja dhe vuajtje. Duke synuar të lejojmë një jetë të lirë ekonomike jemi në situatën të mbyllemi në tërësi”, u shpreh Tolaj në A2.
