Hashim Thaçi, Presidenti i Kosovës, në një konference për mediat pas takimeve me liderët e pozitës edhe opozitës ka dhënë edhe një mesazh të fuqishëm për Bashkimin Evropian.
Në mesazhin për BE-në ai tha që i ka humbur besimi dhe se pa liberalizim të vizave nuk do të mendohet për asnjë hap tjetër në lidhje me BE-në.
“Është fyerje për Kosovën që BE-ja nuk po merr vendim për liberalizimin e Kosovës. Fillimisht duhet liberalizimi i vizave pastaj le të mendojmë për hapin tjetër por jo të na humbin kohë përsëri sepse ne jemi ata që po humbim”, ka thënë Thaçi.
Ai gjithashtu ka thënë se çdo zë kundër SHBA-se tani që gjendet në tavolinën e dialogut është jo në përputhshmëri me realitetin.
“Tash kur e kemi një rrethanë shumë të mirë për Kosovën. Tani SHBA-në e kemi kemi në tavolinë dhe po e udhëheq dialogun e ne duhet ta përdorim këtë mundësi. Çdo zë ndryshe është jo në përputhshmëri me realitetin sepse tek e fundit SHBA-të janë ato që bëjnë paqe në botë por edhe investime në Kosovë”, ka thënë Thaçi.
