Për herë të parë, Ndërmarrja Publike Termokos ka realizuar një test pilot duke përdorur dronë të pajisur me termokamera për të inspektuar rrjetin e saj të ngrohjes qendrore. Kjo nismë inovative u zhvillua në bashkëpunim me kompaninë Drospect, e specializuar në përpunimin e imazheve termike.
Teknologjia e re do të mundësojë identifikimin e humbjeve të mundshme të nxehtësisë, duke ndihmuar në rritjen e efikasitetit energjetik dhe reduktimin e kostove operacionale. Pas analizës së rezultateve të para, Termokos do të shqyrtojë mundësinë e zgjerimit të projektit për të inspektuar të gjithë rrjetin e ngrohjes në Prishtinë.
Menaxhmenti i ndërmarrjes ka theksuar rëndësinë e kësaj metode në përmirësimin e shërbimeve dhe në ruajtjen e një mjedisi më të pastër dhe më të qëndrueshëm për kryeqytetin. “Termokos po i jep kuptim Prishtinës së Gjelbër”, është shprehur Kryeshefi Ekzekutiv, Fisnik Osmani.
Ky hap i ri vjen si pjesë e përpjekjeve të vazhdueshme për të modernizuar dhe optimizuar shërbimet e ngrohjes për qytetarët e Prishtinës.
