Të enjten, më 29 maj, nga ora 10:00 deri në 12:00, bizneset e prekura nga vendimi i Zyrës së Rregullatorit për Energji (ZRRE) do të protestojnë kundër liberalizimit të tregut të energjisë elektrike, duke paralajmëruar bllokimin e hyrjeve kryesore në Prishtinë.
Protesta organizohet nga Oda Ekonomike e Kosovës dhe synon shtyrjen e vendimit të ZRRE-së, si dhe hapjen e dialogut me sektorin privat për të gjetur një zgjidhje të pranueshme.
Pikat e bllokimit të planifikuara janë:
• Hyrja nga Veterniku (te Albi Mall)
• Hyrja nga Fushë Kosova dhe Mitrovica (te rrethi në Lakrishte)
• Hyrja nga Podujeva (te ish-Humanisti / Raiffeisen)
Organizatorët kanë ftuar bizneset e prekura që të marrin pjesë në protestë me automjetet e tyre, ndërsa policia është njoftuar dhe do të jetë e pranishme për të siguruar mbarëvajtjen e saj.
Për të konfirmuar pjesëmarrjen, bizneset janë të ftuara të njoftojnë lokacionin e përzgjedhur për pjesëmarrje, numrin e automjeteve dhe pjesëmarrësve. Shkruan Oda Ekonomike e Kosovës.
